ONNUR TILTØK / Binditúrar / Vestur í Dal

Vestur í Dal

 
Nær: Hósdag, 27. apríl
Tíð: kl. 10:00
Longd: 1½.tíma

Vit møtast á torginum við Mentanarhúsið. Hiðan verður gingið norður á Bug og norður í Støð. Sagt verður frá um Gamla Skúla, Gomlu Støð og søguna um listarverkini úti á grótkastinum.
 
Síðan fara vit norður í Nýggju Støð, har sagt verður frá um handil, skipabygging, reiðaravirksemi við fiskavirking á landi og ikki minst, at hetta virksemi á sín hátt enn livir sítt fríska lív í nýggjum hami.
 
Nú verður farið niðan brekku, har peikað verður á “tvílembuna” hjá Sini Pelkii, sum her gjørdi sín triðja skulptur, meðan hon eitt skifti búði í gomlu húsunum. Hinir báðir fyrru skulpturar hennara standa í París og Berlin.
 
Hildið verður fram niðan brekku til elverkið, spinnaríið og klubban har eldrafelagið Borgin nú húsast. Longri uppi verður støðgað á við gamla svimjingarhylin, sum nú er vorðin til eitt útigallarí við skulpturum, sum ymsir fuglfirðinar hava evnað til. Gingið verður nú vestureftir oman fyri fótbóltsvøllin, sum eisini eigur sína søgu.
 
Hildið verður á fram vestur á Fossar, meðan vakra útsýnið yvir bygd og fjørð verður notið. Hiðani verður farið oman við Gjógvará vestanfyri og norður aftur á torgið við Mentanarhúsið.
 
Bílegg pláss (tað er avmarkað atgongd) við at senda mail til bindifestival@gmail.com ella her